Surpriza e Kategorisë Superiore në sezonin e kaluar, ishte Laçi që arriti të kalonte në Kupat e Europës, pavarësisht se objektiv primar ishte mbijetesa. Goli i Uzunit në Ligën e Europës dhe kualifikimi ndaj Anorthosis ishte qershia mbi tortë e suksesit bardhezi. Ai gol i shënuar nga sulmuesi Uzuni, bëri që karriera e tij të merrte një hov të madh.
Pak ditë më vonë, Uzuni u transferua në kampionatin kroat, aty ku firmosi me Lokomotivën e Zagrebit. Babai i tij, Artan Uzuni, ka treguar momentet e para të Uzunit si futbollist, kalimin e tij në Kroaci dhe natyrisht, emocionet që djali i tij do të grumbullohet me Kombëtaren shqiptare.
Si lindi dashuria e Uzunit për futbollin dhe fillimet e tij?
Uzuni që në moshën 5-6 vjeçare, e ka pasur shumë qejf topin dhe e vura re dëshirën e tij për të luajtur futboll. E shikoja qe hante inat me dy nipërit e mi Refin dhe Lanin, ndonëse ata ishin edhe 7 vjet më të mëdhenj se ai. Atëherë unë fillova ta stimuloja dhe ngrita edhe një ekip këtu në lagje e fillova stërvitjen me të. Kam punuar shumë me të që t’i përmirësoja dy këmbët. Për këmbën e majtë, që sot e ka të barabartë me të djathtën kam punuar shumë në një mënyrë të veçantë. I kam lidhur topin me një rrjetë në dorë, që ai të gjuante vetëm me të majtën dhe tanimë ai nuk e problem.
Sa ka sakrifikuar Uzuni kur ishte fëmijë? Po tani sakrificat e Uzunit fillojnë duke nisur që nga fëmijëria se u privua nga të gjitha lodrat e tjera dhe jeta me shokët, e kjo nuk ishte pak për një djalë të moshës së tij. Ai iu kushtua shumë stërvitjes dhe e gjithë vëmendja ishte aty.
Kalimi nga Laçi te Lokomotiva?
Kishim kohë që e prisnim një transferim të tillë, që kur ishte tek Apolonia, por ishte Laçi, ai që e mundësoi kalimin e Uzunit te një klub si Lokomotiva e Zagrebit. Kam shumë mirënjohje për presidentin e Laçit dhe trajnerin e tij për një periudhe të shkurtër, Z.Besnik Prenga. Transferimi i tij në Kroaci ishte një gëzim i madh për ne sepse djersa dhe mundi i Uzunit u vlerësuan.
Si u përjetua ftesa e Kombëtares për Uzunin?
Edhe sot jam akoma pak i shokuar qe u bë e mundur ftesa, por në fakt e prisja në çdo grumbullim që bënte Kombëtarja A. Isha mësuar nga ekipi i Shpresave, që e ftonte Uzunin rregullisht, por sot, sot më shumë se kurrë, unë jam krenar që im bir përfaqëson Kombin me ngjyrat e flamurit kuqezi.
Pritshmëritë për Uzunin dhe një mesazh për të rinjtë si ai?
Si baba, unë dëshiroj që Uzuni të jetë në majat më të larta të futbollit europian dhe atij Botëror. Duke e ditur forcën, vullnetin dhe pasionin e tij për futbollin, pse jo në një ekip spanjoll. Edhe të tjerëve futbollistë të rinj, do t’iu këshilloja të kenë vullnet dhe të punojnë fort, pasi asnjëra nga këto dyja nuk i kanë munguar tim biri.
Një mesazh për Uzunin?
Babë, peshoje mirë atë fanellë, vlerësoje këtë mundësi që të dhanë për të përfaqësuar atdheun. Na ndero ashtu siç di vetëm ti. Unë jam krenar për birin tim, por edhe lagjja jote dhe të gjithë dashamirësit e tu janë krenar për ty./Vipsport/
