Prej vitesh Bleona Qereti ka lajmëruar se është duke punuar për të nxjerrë në treg një libër që mban emrin dhe firmën e saj. Në të ajo do të shkruajë të pathënat dhe të gjitha të vërtetat e jetës së saj.
Gjatë një interviste të dhënë për ‘Telegraf’, Bleona ka rrëfyer disa detaje pikante. Ajo ka thënë se nuk bëhet fjalë për çfarë është aluduar në mediat rozë, se do të flitet për të dashurit e saj.
Këngëtarja ka zbuluar po kështu se të dashurit e saj janë aq sa për ti numëruar me gishtat e njërës dorë. Në libër, Bleona Qereti do të tregojë të gjitha vështirësitë, me çfarë është përballur, me njerëzit që kanë dashur ta pengojnë.
“Për librin janë bërë shumë aludime. Por mua nuk më intereson fare tregu shqiptar, por ai ndërkombëtar. Libri do të dalë kur unë të jem gati për tregun ndërkombëtar. Që të tregoj historinë time, si jam bërë ‘Bleona’.
Nuk ka lidhje me idiotësitë që lexohen në media. Të tipit, do dalin të dashurit e Bleonës. Sepse siç kam thënë në intervista, të dashurit e mi janë aq sa për t’i numëruar me gishtat e njërës dorë.
Theksoj që nuk ka lidhje me këtë, por me marrëdhëniet njerëzore. Si jam bërë Bleona që jam sot. Aty tregoj të gjitha vështirësitë, me çfarë jam përballur, me njerëzit që kanë dashur të më pengojnë, ose më kanë ndihmuar.
Është libër për marrëdhëniet njerëzore, jo ato seksuale. Dhe nuk është për tregun shqiptar, por për atë ndërkombëtar. Shqipëria është vetëm 10% në gjithë librin. Madje më vjen për të qeshur kur shqiptarët bëhen ‘legjendat e mendjes së tyre’. Pasi nuk e ka njeri mendjen as tek ministrat, as tek qeveria në Shqipëri.
Pjesë e librit janë sheikë, miliarderë, producentë muzike dhe filmash. Sigurisht edhe politikanë shqiptarë. Por nuk ka lidhje me marrëdhëniet seksuale”, shprehet këngëtarja.
