Real Madrid duke e ditur tashmë që ka humbur shërbimet e Cristiano Ronaldos, i cili me shumë mundësi nga java që vjen do të jetë pjesë e Juventusit ka gjetur zëvendësuesin e tij. Ekzistojnë tre pista për të mbuluar pozicioni9n e tij në fushë dhe padyshim e para dhe më e preferuara është ajo e brazilianit Neymar. Por vështirësia e këtij misioni dihet tashmë, duke parë edhe shumën që parisienët paguan tek Barcelona në fillim merkaton e verës së shkuar.
Por nëse nuk arrihet Neymar do të provohet për Mbappe. Edhe për francezin shanset janë ta pakta, pasi sheikët e PSG-së janë shprehur se nuk ka çmim me të cilin mund ta vlerësojmë. Sipas të përditshmes spanjolle “AS”, presidenti madrilen Florentino Perez ka marrë “OK” e sulmuesit belg Eden Hazard, që do të luajë me skuadrën kampione të Europës sezonin e ardhshëm 2018-2019, duke u larguar kështu nga Chelsea.
Numri 10 i kombëtares belge, që është kualifikuar për në gjysmëfinalet e Kupës së Botës (do të luajë ndaj Francës) do të jetë blerja kryesore e kësaj vere për skuadrën “merengues”, futbollisti ka magjepsur edhe presidentin Perez, që është gati të investojë tek Hazard. Madje belgu konsiderohet favorit karshi kampionëve të tjerë si Mbappe e Neymar, ndaj dhe emri i tij po mbahet sekret nga klubi spanjoll, që kërkon të publikojë gjithçka pas 15 korrikut.
Edhe vetë Hazard nuk e ka mohuar asnjëherë dëshirën e tij për të luajtur me skuadrën e Real Madrid në të ardhmen, ndërkohë që kontrata e tij me Chelsea skadon në verën e vitit 2020. Belgu ka refuzuar deri më tani çdo përpjekje të “bluve” të Londrës për rinovimin e kontratës, sinjal ky se dëshiron të largohet. Pavarësisht se nuk është një sulmues i mirëfilltë, Hazard ka treguar se mund ta mbajë peshën e këtij reparti, si te Chelsea ashtu dhe në kombëtare.
