Ronaldo ndal vrullin e PSG-së, Championsi fytyra e vërtetë e Realit (Video)

Real Madrid ka fytyrë tjetër kur dëgjon himnin e Champions League. Madrilenët kanë ulur me këmbë në tokë PSG-në, në përballjen e parë të fazës së 1/8-ve, ku e kanë mposhtur me rezultatin 3-1. Los Blancos arritën të triumfonin në një ndeshje me ritme të jashtëzakonshme falë dy golave të Ronaldos dhe një të Marcelos. Crsitiano ka shënuar golin e 100-të me Real në Champions League, më shumë se çdokush tjetër.

Nga minuta e parë u duk qartë që madrilenët zbritën në fushë vetëm për ta fituar këtë ndeshje dhe qëndruan lartë në sulm gjatë gjithë kohës. Por me kalimin e minutave PSG arrin të futet në lojë duke u munduar të përballojë sa më mirë kundërshtarin. Loja ka ritëm të lartë por mundësia e parë për gol vjen nga gjysma e pjesës së parë me Ronaldo, i cili ka dy mundësi radhazi por tregohet i pasaktë.

Neymar mbanë nën presion gjatë gjithë kohës krahun e tij të sulmit, por pa arritur të shfaqet rrezikshëm. Golin e parë e gjejnë parisienët, ku pas një topi të hedhur në zoinë nga Mbappe, Rabiot i vetëm godet nga brenda zonës dhe e dërgon topin në rrjetë.

Por PSG nuk e gëzon shumë avantazhin pasi Ronaldo barazon gjithçka nga pika e bardhë e penalltisë pak përpara fundit të pjesës së parë. Pas pushimit ritmi bie dhe skuadrat janë më të kujdesshme. PSG arrin të krijojë një epërsi të vogël dhe krijon disa mundësi shënimi por pasimi i fundit është i pasaktë nga vizitorët.

Dhe në fund të takimit kur dukej sikur barazimi do të ishte rezultati më i drejtë, ishin Ronaldo dhe Marcelo ata që përmbysin rezultatin falë dy golave që më shumë meritë kishte portieri kundërshtar sesa ata.