Cristiano Ronaldo i ka dhuruar magji këtij Botërori duke barazuar përballë Spanjës me rezultatin 3-3. Ishte ai ylli i Portugalisë i cili shënoi tre gola të cilët rezultuan deciziv për ndeshjen. Sulmuesi i Real Madrid vazhdon të shkruajë historinë…
Fernando Hierro kishte një debutim të mirë me Spanjën, pasi kujtojmë që kishte vetëm 48 orë që kishte marrë drejtimin e tyre, pasi u shkarkua Julien Lopetegui, sepse kishte firmosur paraprakisht me Real Madrid.
Ndeshja nis me ritëm të lartë, ku vetëm pas 4’ minutash lojë Cristiano Ronaldo fiton një penallti me mjaft zgjuarsi dhe nuk gabon përballë De Geas, duke i dhënë avantazhin kampionëve të Europës.
Por në mesin e pjesës së parë ishte Diego Costa ai që barazoi rezultatin pas një aksioni personal dhe të fituar me shumë forcë si është edhe karakteri i tij.
Në fundin e pjesës së parë ishte sërish Ronaldo që me një goditje të fortë nga jashtë zone e dërgon topin në rrjetë. Ishte një gabim i De Geas i cili nuk arrin ta ndalojë topin dhe përfudon në rrjetë.
Në minutën e dhjetë të pjesës së dytë, Busquets bëri spondin me kokë dhe Diego Costa realizoi golin e barazimit për Spanjën me portën e boshatisur.
Vetëm tre minuta më vonë, Nacho, realizoi golin e tretë për ekipin e Hierro. Mbrojtësi i Real Madrid tundi rrjetën me një goditje nga jashtë zone, e cila u përplas në shtyllë dhe më pas përfundoi në rrjetë. Ndoshta goli më i bukur deri në këtë pikë të Kupës së Botës. Ky ishte goli i parë që një futbollist i Spanjës shënon nga jashtë zone, që nga viti 1998.
Por kur mbeteshin edhe tre minuta lojë, Cristiano Ronaldo u konfirmua si një nga futbollistët më të mirë në qarkullim, duke realizuar me goditje dënimi golin e tretë për Portugalinë, të tretin personal, që vulosi barazimin 3-3.
Ronaldo bëhet futbollisti i katërt që shënon në katër edicione të ndryshme të Kupës së Botës.
