Derbi i Madridit dhuron spektakël, por mbyllet pa fitues. Është mbyllur 1-1 supersfida mes Real Madridit dhe Atleticos, ku Ronaldo dhe Griezmann shënojnë në harkun e 3’ minutave në fillimin e pjesës së dytë. Atletico mbetet në vendin e dytë të La Liga, me katër pikë më shumë se Real i vendit të tretë, por plot 11 pikë pas Barcelonës, që fitoi 3-1 ndaj Leganes, të shtunën në mbrëmje dhe marshon drejt titullit kampion.
Pjesa e parë dhuroi spektakël me shumë aksione të shpejta por pa gola, u vu re qartë një dominim i Realit por që nuk arriti të bënte diferencën. Në fillim të së dytës është Ronaldo që u jep avantazhin madilenëve në “Bernabeu” pas krosimit të Gareth Bale, duke realizuar golin e 23-të në këtë kampionat, gjashtë më pak se golashënuesi më i mirë Lionel Messi.
Gjithsesi, avantazhi i “Los Blancos” zgjati vetëm katër minuta, pasi francezi Antonie Griezmann vuri baraspeshën për të besuarit e Simeone.
Real Madrid nuk arriti të fitojë për herë të pestë radhazi kundër Atletico Madrid në “Bernabeu”, i ndalur edhe nga pritjet e Oblak. Vlen për t’u përmendur se nga 36 goditjet e fundit në kuadratin e Atletico në La Liga, portieri i tyre ka pritur 32…
