Propozimi i Spanjës, Irlandës dhe Sllovenisë është refuzuar nga ministrat e Jashtëm të BE-së, Tajani: “Është më mirë të forcohen sanksionet e targetuara”
BE-ja nuk hedh asnjë hap kundër qeverisë së Netanyahu-t. Edhe ideja për të bllokuar marrëveshjen tregtare me Izraelin mbetet vetëm në letër.
Edhe pse vendimet e qeverisë së shtetit hebre po marrin kritika të njëzëshme nga Unioni, propozimi i paraqitur zyrtarisht nga Spanja, Irlanda dhe Sllovenia për të pezulluar marrëveshjen e bashkëpunimit është refuzuar nga ministrat e Jashtëm të BE-së, të mbledhur dje në Luksemburg. Shumë të thella janë ndarjet e brendshme, duke nisur nga kundërshtimet e Italisë dhe Gjermanisë.
“Disa shtete anëtare kanë propozuar një pezullim të plotë ose të pjesshëm të marrëveshjes. Për shkak të mungesës së mbështetjes unanime, këto propozime nuk u miratuan sot”, ka pranuar Përfaqësuesja e Lartë për Politikën e Jashtme të BE-së, Kaja Kallas. Megjithatë, Kallas ka premtuar se Komisioni do të paraqesë një propozim të posaçëm, duke theksuar, në përgjigje të kritikave nga Madridi, se në këtë mënyrë Evropa fiton më shumë autoritet, jo më pak.
Megjithatë, ndarjet mes 27 vendeve mbeten. “Nuk ka kushte as numerike dhe as politike. Është më mirë të vendosen sanksione individuale, për shembull ndaj kolonëve të dhunshëm, duke i forcuar ato, por nuk besoj se bllokimi i marrëveshjes tregtare është një mjet i dobishëm sepse do të godiste popullsinë izraelite. Ne kemi një qëndrim të ngjashëm me Republikën Federale Gjermane”, ka shpjeguar ministri italian i Jashtëm, Antonio Tajani.
Në çdo rast, në prag të samitit të liderëve që nis nesër në Qipro, do të kishte qenë e vështirë të merrej një vendim përfundimtar.
Para samitit të djeshëm, më i drejtpërdrejtë ishte ministri spanjoll, Jose Manuel Albares. “Sot vihet në lojë besueshmëria jonë. Duhet të flasim me një zë të vetëm. Duhet t’i themi qartë Izraelit se duhet të ndryshojë, nuk mund të marrëdhënie me fqinjët vetëm përmes luftës. Është momenti për të dërguar një mesazh të fortë”, u shpreh ai.
Përfaqësuesi belg, Maxime Prevot, kishte sugjeruar një “pezullim të pjesshëm” të marrëveshjes me Izraelin. Ndërsa ministrja irlandeze, Helen McEntee, kishte parashikuar me realizëm se nuk do të arrihej një marrëveshje. Suedia, së bashku me Francën, kishte tentuar një ndërmjetësim duke propozuar kufizimin e shkëmbimeve tregtare pa i bllokuar ato. Pra, gjithçka është shtyrë për më vonë.
Ndërkohë, Përfaqësuesja e Lartë për Politikën e Jashtme të BE-së shpreson ende për një zgjidhje diplomatike të konfliktit në Gjirin Persik dhe, nëse është e nevojshme, për një zgjatje të armëpushimit.
“Nuk po qëndrojmë spektatorë. Po bashkëpunojmë aktivisht me partnerët rajonalë sepse ndajmë të njëjtat shqetësime. Sigurisht, armëpushimi është shumë i brishtë, por diplomacisë duhet t’i jepet një shans. Shpresoj që armëpushimi të zgjatet derisa të gjendet një zgjidhje diplomatike”, ka thënë ajo për pozicionin e Evropës. Përfaqësuesja e Lartë për Politikën e Jashtme të BE-së ka njoftuar gjithashtu se mes 27 vendeve ka konsensus për nevojën e vendosjes së sanksioneve ndaj atyre që do të vazhdojnë të bllokojnë Ngushticën e Hormuzit.
Në fund, Kallas ka konfirmuar optimizmin për zhbllokimin e kredisë për Ukrainën, e cila deri pak ditë më parë ishte bllokuar nga qeveria në largim e Hungarisë e udhëhequr nga Viktor Orban. Drita jeshile pritet të jepet nesër në mbledhjen e Coreper, Komiteti i 27 ambasadorëve të BE-së.
