Pas shumë orësh vonesash në pikat e kalimit kufitar të Kapshticës dhe Kakavijës, tashmë situata i është rikthyer normalitetit. Prej orëve të para të ditës ka nisur puna, por që po punohet me ritme të ngadalta.
Kujtojmë këtu faktin se mbrëmjen e djeshme u bllokua qarkullimi i qytetarëve në dy pikat kufitare me Greqinë. Autoritetet greke sinjalizuan se ishte dëmtuar sistemi kompjuterik grek, e si pasojë doganat do të ishin të bllokuara.
Problemet nisën rreth orës 20:00 të së hënës. Në pikat kufitare u ndalua kalimi i kufirit vetëm në dalje të Republikës së Shqipërisë, ndërsa në mënyrë përzgjedhëse, autoritetet kanë lejuar kalimin në Kapshticë të personave të pajisur me pasaportë greke apo leje qëndrimi, duke krijuar kështu radhë të gjata.
Dhjetëra automjete, por edhe mjete të transportit të udhëtarëve, janë kthyer pas si rrjedhojë e kësaj situate. Ndërsa në Doganën e Kakavijës u lejuan të kalojnë vetëm shtetasit shqiptarë që kanë leje qëndrimi.
