Alkond Bengasi, që mban tashmë statusin e bashkëpunëtorit të drejtësisë për grabitjen në Rinas, i pyetur nga prokurorët e Krimeve të Rënda nëse është i gatshëm të identifikojë personat me emrat Tani dhe Olti, është përgjigjur se është në gjendje t’i identifikojë ata.
Në dosjen e siguruar për “BalkanWeb”, Bengasi ka përshkruar dy personat në fjalë, Oltin Veseli dhe Tanin.
“Po unë jam në gjendje ti identifikoj këta persona nëse me paraqiten nga ana juaj. Olti është i moshës rreth 40 vjeç, me trup rreth 175 cm i gjatë, trup normal, me flokë si të verdha, me fytyrë te bardhë, me dialekt si nga Fushë Kruja. Olti mesa më ka thënë Klementi ka qenë në forcat komando që kanë qenë jashtë shtetit.
Tani është i moshës rreth 35 vjeç, me trup rreth 180-185 cm, trup normal pa bark, me flokë gështenjë të shkurtra, ai vishej zakonisht sportive. Sa herë e kam parë mbante të njëjtat veshje. Të dy këta shtetas qendronin të pa rruar, por jo më mjekër të madhe, për të dy këta shtetas kam dëgjuar se ishin besimtarë të fesë myslimane. Kujtoj që TANIN e kam parë njëherë në Elbasan së bashku me Eldin të rrobaqepësia sëbashku. Kujtoj që ka qenë aksham dhe më ka marrë e ëma e Klementi e kam shkuar t’u jap ushqim qenve.”
