Ditët e fundit Holanda po rishikon mundësinë e rikthimit të vizave me Shqipërinë. Duke iu referuar shtimit të bandave kriminale në këtë vend policia dhe prokuroria holandeze ka këshilluar vendosjen e vizave për shqiptarët.
E gjitha kjo i referohet një raporti të qeverisë holandeze të dalë ditët e fundit, sipas të cilët elementet kriminalë shqiptarë janë fuqizuar se tepërmi në këtë vend. Sipas raportit, organet ligjzbatuese holandeze kanë parë të udhës pezullimin e lëvizjes së lirë të shqiptarëve drejt Holandës dhe për pasojë edhe rikthimin e plotë të vizave me këtë vend.
“Kriminelet shqiptarë shikohen si një kërcënim serioz për shoqërinë holandeze pasi janë të implikuar në trafikimin dhe shitjen e kokainës dhe kanabisit, trafikimin njerëzor dhe pastrim parash. Roli i kriminelëve shqiptarë po forcohet, dhe ka marrë një rol prominent në Holandë. Ka një mbiprezencë të madhe te shqiptarët në trafikun e drogës dhe pastrimin e parave. Një tjetër problem janë klandestinët shqiptarë, të cilët përdorin portet holandeze për të ikur ilegalisht në Angli”, shkruhet në raport i siguruar nga Abc Neës.
Sipas Policisë, 5800 persona në vitet e fundit të paktën janë regjistruar në sistemin policor në lidhje me veprat penalë të kryera në territorin e Mbretërisë së Vendeve të Ulëta.
Sipas raportit, shqiptarët janë të përfshirë kryesisht në trafikun e drogës, trafikimin njerëzore si dhe pastrimin e parave. Po ashtu një burim i policisë holandeze, që thotë se për momentin trafikimi i drogës dhe ai njerëzor, kryhen nga shtetas shqiptarë dhe përbëjnë një rrezik serioz për rendin publik në Holandë.
Një faktor shqetësues i Policisë Holandezë është që në Shqipëri është relativisht e lehte të ndryshosh emrin dhe mbiemrin, gjë që sipas raportit është bëre nga rreth 700.000 në Shqipëri.
Sipas raportit, kjo do të thotë që rreth 1 në 3 shqiptarë ka bërë ndryshime në identitet, gjë që vështirëson punën e Policisë në Holandë.
Raporti vë në dukje se përveç ndryshimit të emrit që mund të behët në një mënyrë legale në Shqipëri, ka dhe raste ku një person ka mundur të ndryshojë dhe atësinë dhe datëlindjen e tij në pasaportë, diçka që në asnjë vend nuk do të ishte e mundur.
Në raport përshkruhet se nga vëzhgimet e Policisë së Amsterdamit, shumë rrallë shihen shtetas shqiptarë që qëndrojnë si turistë legjitimë në Holandë. Pothuajse të gjithë shqiptarët që qëndrojnë në Holandë janë për shkak të pjesëmarrjes në veprimtari kriminale.
Raporti tregon se pas liberalizimit të vizave, puna e kriminelëve shqiptarë në Holandë është lehtësuar. Por, sipas raportit rritja e faktorit të krimit në Holandë është diçka e viteve të fundit dhe Qeveria e këtij vendi për këtë arsye duhet të marrë masa konkrete dhe të menjëhershme për të mos lejuar që krimi shqiptar të forcohet dhe stabilizohet struktualisht në Holandë. Për këtë arsye, është kërkuar qeverisë të pezullojë lëvizjen e lirë për shtetasit shqiptarë në zonën Schengen.
