Barazimin e Romës përballë Bolognas e kanë shfrytëzuar mjaft mirë Interi dhe Laziotë cilët kanë përfituar me fitoret e tyre në luftën sa i përket vendeve për në Champions League sezonin e ardhshëm. Të dy ekipet kanë marrë fitore bindëse, ku Interi priste në “San Siro” Veronën, ndërsa Lazio në “Olimpico” u përball me Beneventon.
Inter ka fituar 3-0 ndaj Verona në “San Siro” duke mbrojtur vendin e katërt. Ishte Mauro Icardi që hapi serinë e golave akoma pa u bërë një minutë lojë, pas një asistimi perfekt të Perisic nga rivënie anësore. Më pasi ishte kroati që dyfishoi rezultatin dhe më pas ishte sërish kapiteni zikaltër që shënoi sërish për të vulosur 3-0.
Zikaltërit kanë një pikë më shumë se Lazio e vendit të pestë, që fitoi 6-2 ndaj Benevento në “Olimpico” dhe dy pikë më pak se Roma e vendit të tretë.
Icardi ka shënuar 24 gola në këtë edicion të Serie A, ku është i dyti në renditjen e golashënuesve me dy gol më pak se Ciro Immobile, i cili shënoi dy nga gjashtë golat e Lazio në fitoren me përmbysje ndaj Benevento, që e mbylli ndeshjen me dhjetë futbollistë.
Në ndeshjet e tjera të luajtura në pasditen e Serie A, Fiorentina dhe Atalanta fituan 2-0 në fushën e tyre përkatësisht ndaj Crotone dhe Udineze. Torino triumfoi në transfertë, 4-0 në Cagliari, ndërsa në barazim 1-1 u mbyll Genoa-SPAL. Në mbrëmje (ora 20:45) luhet ndeshja e fundit e javës së 30-të, “supersfida” Juventus-Milan.
