Pas ditëve me diell, është rikthyer moti i keq, ndërsa alarmi jepet jo vetëm për zonat malore, teksa priten reshje dëbore edhe në kryeqytet.
Por, cilat janë zonat më problematike ku ka vështirësi qarkullimi?
Ministria e Mbrojtjes ka dhënë informacione lidhur me situatën aktuale, ndërsa bën me dije se grupi i vlerësimit i Qendrës së Bashkuar Operacionale dhe përfaqësues të drejtorisë operacionale janë në krye të detyrës.
“Nga raportimet dhe vlerësimet, më problematike situata paraqitet: Qarku Dibër dhe Qarku Kukës”, thekson ministria e Mbrojtjes.
Po ashtu, mësohet se mjetet dhe forcat janë në gatishmëri dhe po vijon koordinimi me strukturat e emergjencës në pushtetin vendor.
Aktualisht verilindja e vendit është pushtuar nga moti i keq dhe reshjet e borës, ndërsa temperaturat zbritën deri në -4 gradë celsius.
Reshjet e dëborës të shoqëruara me erëra të forta pengojnë qarkullimin normal të makinave në Rrugën e Kombit, ndërsa probleme ka në akset e tjera rrugore, që lidhin Kukësin me Peshkopinë, Hasin edhe Tropojën. Në disa zona të Bushtricës edhe Kalisit pati probleme edhe me energjinë elektrike.
Edhe në Dibër, bora po paraqet probleme. Njësitë administrative, Lurë, Kalaja e Dodës, Selishtë, Trebishtë dhe Ostren janë të bllokuara, teksa trashësia e borës ka arritur deri në 35 centimetra.
