Lëvizja Vetëvendosje pritet të shkojë në zgjedhjet e 11 qershorit me kandidatin e saj për kryeministër, ish-liderin, Albin Kurti.
Siç bën të ditur Klan Kosova, ky subjekt politik tashmë ka caktuar Kurtin si kandidat të saj, ndërsa zyrtarizimi pritet të bëhet në një votim formal në Këshillin e Përgjithshëm të kësaj partie.
Ndërkohë që sonte është edhe afati i fundit i caktuar nga Komisioni Qendror Zgjedhor që partitë politike të paraqesin koalicionet me të cilët do të garojnë në zgjedhjet e 11 qershorit .
Ndërkohë Lëvizja Vetëvendosje u ka bërë thirrje qytetarëve të Kosovës të cilët jetojnë jashtë vendit që të marrin pjesë masivisht në zgjedhjet e 11 qershorit.
Deputeti i VV Faton Topalli, në një konferencë për media foli për rëndësinë e mërgatës kosovare duke thënë se roli i saj në ekonominë e vendit është jashtëzakonisht i madh.
Ai tha se një biletë e aeroplanit mund të bëjë ndryshimin në Kosovë.
Topalli tha se Lëvizja Vetëvendosje do të angazhohet me tërë potencialin që t’u krijojë kushte dhe hapësirë qytetarëve që janë në mërgim që të vijnë në Kosovë dhe të kontribuojnë përmes dijes së fituar jashtë vendit.
“Është pjesa më vitale e popullit tonë dhe është e jona që të krijojmë kushte të marrin pjesë në zgjedhje”, u shpreh Topalli.
