Kompania farmaceutike gjermane, CureVac NV tha të mërkurën se vaksina e saj kundër koronavirusit ishte vetëm 47% efektive, gjatë një prove të realizuar në fazën e vonë.
Ky rezultat është një zhgënjim i madh, pasi kjo vaksinë është konsideruar një kohë të gjatë si kandidati më shpresëdhënës në luftën kundër virusit, shkruan India Shorts.
Sipas informacioneve të Curevac, rreth 40.000 persona kanë marrë pjesë në studimet me këtë vaksinë. Për analizën e përkohshme janë kontrolluar 134 raste të personave të sëmurë nga COVID-19, teksa janë konstatuar të paktën 13 variante të ndryshme të virusit.
Njoftimi menjëherë pati një efekt dramatik në Bursën e Nju Jorkut, ku aksionet e Curevac shënuan një rënie shumë të madhe.
Bashkimi Evropian ka siguruar paraprakisht deri në 405 milionë doza të vaksinës Curevac. Ministria gjermane e Shëndetësisë kohët e fundit njoftoi se ilaçi do të përfshihej në planifikimin e fushatës së vaksinimit, pas licencimit të vaksinës.
