Kombëtarja Shpresat do të zhvillojë dy takime mjaft të rëndësishme përballë Sllovakisë, nga të cilat mund të arrijnë kualifikimin në Europianin 2019 për të rinjtë. Tek ekipi i drejtuar nga Alban Bushi është rikthyer për të dhënë kontributin e tij edhe Rey Manaj. Lojtari i Interit aktualisht është i huazuar në kampionatin spanjoll(Spanjë Segunda) dhe pas këtij rikthimi sheh shumë pak ndryshime në skuadër.
Rey Manaj kishte disa ndeshje që nuk grumbullohej me ekipin e Shpresave, pasi ishte ftuar në Kombëtaren A nga tekniku italian, De Biasi. Por tani që Bushi ka nevojë për disa lojtarë me kualitet, për të fituar dy ndeshje që do të realizonin një ëndërr, 21-vjeçari ka pranuar me kënaqësi ftesën. “Kam një vit e gjysmë që mungoj te Shpresat. Çfarë ka ndryshuar? Unë besoj se pak gjëra kanë ndryshuar. Gjëja kryesore është që ekipi të luajë mirë, të marrë rezultate. Një lojtar, dy apo tre të tillë, nuk do të thotë asgjë. Para së gjithash është ekipi Shpresa, ndaj nuk duhet të fokusohemi kush mungon, kush nuk vjen dhe gjëra të tjera.”
Në ndeshjen e fundit me ekipin e tij, Granadan, Manaj është përfolur shumë se u ndëshkua me karton të verdhë me dashje, pasi në mënyrë tjetër nuk mund të ishte prezent në dy ndeshjet me Sllovakinë. “Kisha katër kartonë të verdhë te Granada dhe këtë ndeshje nuk mund të luaja me skuadrën time. Nuk e mora me qëllim kartonin e fundit të verdhë, meqë do të vija me kombëtaren. Më mirë kështu, se tani, kur të kthehem, nuk do të mungoj më asnjë ndeshje për shkak kartonësh, sepse i kam zeruar për momentin. Nuk jam thirrur te kombëtarja e parë, por te U-21.”
Ndeshjet me Sllovakinë? “Dy eliminatoret që kemi ndaj Sllovakisë tani janë më të rëndësishme se miqësorja që ka ekipi i parë. Me Norvegjinë është vetëm një miqësore. Shpresoj që në këto dy ndeshje me ekipin U-21 të marrin rezultatet që duam dhe nuk mendoj për asgjë tjetër. Të gjithë lojtarët duhet të kenë përgjegjësi kur veshin fanellën kuqezi”.
