Në Gjykatën e Apelit Tiranë, ka nisur seanca ndaj Rexhep Rrajës, djalit të deputetit socialist Rrahman Rraja. Rexhep Rraja ka zgjedhur të mos jetë i pranishëm në seancë, e ndërsa ka njoftuar mospjesmarrjen përmes një letre.
Ai justifikohet se nuk do të jetë i pranishëm, për arsye personale. Rraja kërkon të shfuqizohet masa “arrest me burg” e dhënë nga gjykata e Krujës, pasi akuzohet për “përndjekje” të Xhisiela Malokut.
“Për arsye personale nuk dëshiroj të marr pjesë në seancë”. Argumentat e avokatit, Ilir Murati, janë ato që nuk ka vepër penale për “përndjekje”, apo dhunë ndaj Xhisiela Malokut, siç pretendon Prokuroria. Avokati thotë se kemi të bëjmë me një histori rozë, dhe se nuk ka të bëjë me veprën penale të “përndjekjes”.
“Kërkoj shfuqizimin e vendimit të Gjykatës së Krujës, dhe kërkoj lirimin e menjëhershëm. Kemi një histori rozë që nuk ka të bëjë me veprën penale të “përndjekjes”. Dëmtimet e shkaktuara te shtetasja Xhisela Maloku, nuk përcaktojnë kohën kur është bërë”, ka deklaruar avokati.
Avokati ka përdorur si argument edhe deklaratat e fundit të vajzës. Sipas tij, kjo çështje është politizuar. “Xhisiela Maloku del përditë në televizione, dhe thotë se nuk është përndjekur. Çështja është politizuar, dhe ju jeni në presion”.
Avokati i Rrajës thotë se klienti i tij po mbahet padrejtësisht në burg, pasi denoncimi i Xhisiela Malokut është bërë për shkak të xhelozisë.
Madje Murati thotë se “ka plot vajza që digjen për ‘hobi’ me cigare në trup”. Ai ka thënë se nga pamjet e kamerave, Rexhep Rraja dhe Xhisiela Maloku dolën të përqafuar nga hoteli.
“Xhisiela më ka ardhur në zyrë. Pranoi që e kishte bërë për xhelozi”, ka thënë avokati.
Kujtojmë këtu se Rexhep Rraja është prangosur në datën 30 shtator. Ai akuzohet për përndjekjen e ish-të dashurës së tij, Xhisiela Maloku.
E ndërsa Xhisiela i ka mëshuar fort faktit në intervistat e fundit, se Rexhepi nuk e ka keqtrajtuar.
