KQZ ka shqyrtuar sot kërkesën e Prokurorisë për heqjen e mandatit të deputetëve Gledion Rehovica, i zgjedhur nga LSI dhe Aqif Rakipi, deputet i PDIU-së.
Prokuroria e akuzon deputetin në qarkun e Beratit, Rehovica se preket nga ligji i dekriminalizimit, pasi gjatë kohës që studionte në Itali është ndaluar për vjedhje, ndërsa ka deklaruar emrin Kusta Mina në 27.02.1999.
Por, përse zgjodhi pikërisht këtë emër në momentin që Rehovica u ndalua në Romë?
Report Tv mëson se Mina Kusta, apo Kusta Mina, sikur e ka deklaruar Rehovica në 1999, është emri i shokut të tij të fëmijërisë në Berat.
Rehovica dhe Mina Kusta kanë kryer shkollën fillore bashkë, ndërsa më pas rrugët e tyre u ndanë, pasi i zgjedhuri i LSI u largua në Itali, ndërsa Kusta në Turqi për studime.
Megjithatë Gledion Rehovica duket se nuk e ‘harroi’ shokun e fëmijërisë, pasi zgjodhi që të jepte para autoriteteve italiane pikërisht emrin e tij në momentin që u ndalua. Mina Kusta ka drejtuar disa banka në Shqipëri, ndërsa tani është funksionar shtetëror.
KQZ I KTHEN DOSJEN PROKURORISE
Komisioni Qëndror i Zgjedhjeve ka vendosur që t’i kthejë dosjen Prokurorisë së Përgjithshme për deputetin e LSI-së Gledion Rehovica, për të cilin organi i akuzës kërkoi heqjen e mandatit në kuadër të ligjit të Dekriminalizimit.
Me 4 vota pro dhe 3 kundër, KQZ do t’i kërkojë Prokurorisë informacion shtesë për deputetin Rehovica.
Ka qenë propozimi i anëtarit të KQZ Gëzim Veleshnja që kërkoi nga Prokuroria të sqarojë termin “raportim policor” që ka përmendur në dosje. KQZ ka pranuar datën 5 Janar si afat që Prokuroria t’i sjellë informacionin shtesë organit të akuzës.
Ndërkohë, në mbledhjen e Komisionit Qëndror të Zgjedhjeve ka qenë i pranishëm vet deputeti Rehovica, i cili tha para anëtarëve të KQZ-së se ndaj tij nuk ka pasur asnjëherë çështje gjyqësore në Itali.
“Në atë periudhë kam qenë student për shkenca politike në Romë. Me detaje nuk e kujtoj këtë histori, por nuk jam munduar të fsheh asgjë. Nuk kam pasur në asnjë moment urdhër ndalimi, gjykimi apo çdo lloj gjëje tjetër në Itali”, deklaroi deputeti Gledion Rehovica.
Sipas Prokurorisë, në vitin 1999 Rehovica ka qenë i dënuar në shtetin italian për vjedhje dyqani dhe ka fshehur identitetin e rremë Kusta Mina që ka përdorur në ato vite.
KQZ SHTYN SEANCËN PËR RAKIPIN
Komisioni Qëndror i Zgjedhjeve ka shtyrë seancën edhe për mandatin e deputetit të PDIU-së Aqif Rakipi, për të cilin Prokuroria e Përgjithshme kërkon heqjen e mandatit në kuadër të ligjit të Dekriminalizimit.
KQZ vendosi që t’i kërkojë organit të akuzës informacion shtesë për dosjen e deputetit Rakipi në lidhje me dënimin e tij në Itali.
Prokuroria pretendon se deputeti i PDIU-së ka fshehur dënimin në Itali dhe ka përdorur identitetin e rremë Skënder Ejylbegaj. TIRANA TODAY
