E ardhmja e Valon Berishës pas ndërprerjes së bisedimeve me Sampdorian duket se do të vazhdojë në Serie A. Dhe do të jetë pikërisht ekipi që u përfol fillimisht se do ti bashkoheshe, Lazio. Mesfushori i Salzburgut duket se është shumë pranë kalimit tek lacialët ku do të gjejë edhe shqiptarët Igli Trae dhe Thomas Strakosha.
25-vjeçari i përfaqësueses së Kosovës ishte shumë pranë kalimit te Sampdoria po në Serinë A, por në fund skuadra nga Gjenova u tërhoq nga bisedimet, pasi lojtari vonoi në kthimin e një përgjigjeje përfundimtare. Edhe Salzburgu lajmëroi në një njoftim për shtyp pak ditë më parë se futbollisti do të vijonte përgatitjet me skuadrën.
Duket se gjithçka është luajtur pas kuintave. Vetëm kështu mund të interpretohet vendimi i Berishës për të mos marrë në konsideratë ofertat nga klubet e tjera.
Mesfushori shqiptar pritet të zbarkojë se shpejti në Romë për të kryer vizitat mjekësore e në fund për të hedhur të zezën mbi të bardhë me Lazion. Tifozët lacialë i njohin shumë mirë cilësitë e Berishës, pasi skuadra e tyre u eliminua pikërisht nga Salzburgu në çerekfinale të Europa League-s sezonin që kaloi.
