Mes Kosovës dhe Shqipërisë vazhdon një “luftë” për të rrëmbyer talentet. Së fundmi ishte Kastriot Dërmakut, futbollisti i cili u largua nga “Dardanët” për të luajtur me kuqezinjtë. Trajneri Shaland edhe pse e kishte grumbulluar në dy ndeshjet e fundit, nuk e aktivizoi për asnjë minutë dhe kjo bëri që ai të refuzonte grumbullimin e radhës.
Këtë veprim mund ta bëj edhe kapiteni i Kosovës U-21, talenti Ardian Ismajli. Sa shumë e kërkoi Panucci këtë njeri, teksa në qendër të mbrojtjes, është një mur i vërtetë për t’u kaluar. Por vetë futbollisti zgjodhi që të vazhdojë me Kosovën. Por tashmë ka një ndryshim të historisë.
Shaland e la Ismajlin jashtë listës për dy ndeshjet e tetorit, ndërsa e ftoi lojtarin për takimin ndaj Ishujve Faroe, pas dëmtimeve të shumta qe kane “dardanët”. Sipas asaj që raporton “Gazeta Olle”, Ismajli e ka refuzuar ftesën, duke mos pranuar të grumbullohet me Kosovën, për shkak të mënyrës së trajtimit.
Ky reagim lë hapur mundësinë që futbollisti të përsëris rastin e Dërmakut, për t’iu bashkuar kuqezinjve në të ardhmen, ndërsa interesi i Federatës tonë për të marrë shërbimet e lojtarit, ka qenë i lartë, nisur kjo nga vetë potenciali i tij.
