Reforma në fushën e inspektimeve pritet të formalizojë ekonominë e vendit. Në kuadër të kësaj reforme Inspektorati Qendror paraqiti projektligjin që parashikon reduktimin e numrit të zyrave por dhe të mënyrës së punës.
Në një tryezë të posaçme kreu i Inspektoratit Qendror, Shkëlqim Hajdari theksoi se ky projektligj rrit efikasitetin në shërbim të ekonomisë.
“Unë si inspektor i përgjithshëm dhe gjithë stafi im këtë reformë e shohim si një reformë që t’i shërbejë formalizimit të ekonomisë shqiptare. Është e vërtetë që historia e inspektimeve në Shqipëri është mesjetare për mua. Kjo që duam të ndërtojmë ne është standard siç e kanë vendet e BE dhe ne do ta realizojmë. Historia e blloqeve do të jetë histori muzeumi”, u shpreh Hajdari.
Përveç pjesës së reformimit, roli i inspektorëve nuk duhet të jetë ai ndëshkues për bizneset por këshillues. Një aspekt i rëndësishëm është edhe përfshirja e sistemit të karrierës.
“Ne kemi kryeinspektorë banditë dhe kriminelë, edhe nuk do të ndodhë më kjo nëse futim sistemin e karrierës në Shqipëri. Ti nuk mund të bëhesh kryeinspektor nëse nuk ke punuar për vite të tëra inspektor i thjeshtë”, theksoi kreu i Inspektoratit Qendror.
Nga ana tjetër, këshilltari për Sigurinë Kombëtare në Kryeministri, Sandër Lleshi nënvizoi se inspektorët duhet të jenë në lartësinë e duhur gjatë ushtrimit të detyrës së tyre.
