Minatorët, mjaft të rebeluar, kanë shprehur haptazi pakënaqësitë teksa protestuan pak çaste më parë tek Kryeministria. Me tone të larta, ata kërkuan plotësimin e statusit që atyre u takon. Ata, përmes ironisë kanë thënë se 140 deputetë janë shumë, e mbi të gjitha nuk plotësojnë nevojat e qytetarëve. Duke vënë në dukje se ishin mbledhur në një protestë paqësore, ata i mëshuan faktit se nuk do të lëviznin, deri në plotësimin e kërkesave të tyre.
“Juve i keni dhënë statusin oficerëve, që hanin pilaf e pula maleve. Ju bëj një pyetje, sa oficerë janë vrarë maleve?
Ju jeni 140 deputetë, pse duhet të jeni kaq shumë? Duhet të ketë deputetë aq sa ka bashki dhe rrogat e deputetëve të tjerë tu shpërndahen pensionistëve.
Ne jemi këtu për një protestë paqësore, sepse mbi të gjitha jemi familjarë, jemi gjyshër dhe duam të drejtat tona, duam statusin që na takon”, u shpreh njëri prej minatorëve.
Sipas tyre, minatorët marrin vetëm 100 euro në muaj, ç’ka është shumë pak për të përballuar jetesën.
“Ne nuk lëvizim më nga vendi, jemi mashtruar boll gjithë këto kohë”, tha një tjetër minator.
