Levante i ka dhënë një goditje shumë të rëndë Real Madridit, pasi i ka shkaktuar humbjen e tretë në katër ndeshjet e fundit në La Liga. Trajneri Lopetegui nuk arriti të rikthente optimizmin e duhur në grup dhe Levante e Enis Bardhit e shfrytëzoi më së miri duke i mposhtur 2-1 në “Santiago Bernabeu”. Ishte Marcelo ai që shënoi golin që i dha fund thatësirës më të madhe të historisë prej 491 minutash pa shënuar.
Akoma pa u nxehur mirë, Reali kaloi në disavantazh që në minutën e 6’. Pas një pasimi të bukur, Jose Morales gjendet vetëm për vetëm me portierin dhe dërgon topin në rrjetë. Vendasit u munduan të reagonin menjëherë, por janë befasuar me golin e dytë pas një penalltie të dhënë pas konfirmimit të VAR-it. Ishte Marti Roger ai që nuk gaboi nga pika e bardhë.
Ngërçi mendor i Los Blancos është i dukshëm teksa lojtarët krijojnë mundësi pas mundësie, por nuk arrijnë të dërgojnë topin në rrjetë. Padyshim që u mungon edhe fati, si në rastin e shtyllës së Sergio Ramos.
Pas pushimit ndeshja luhet në gjysmëfushën e Levante-s dhe pas shumë tentativash të njëpasnjëshme, ishte Marcelo që ngushtoi diferencën me golin tij të parë sezonal në minutën e 72’. Mbrojtësi goditi në shenjë me të djathtën dhe ndez atmosferën e Bernabeu-t. Hapësirat për të shënuar mbeten, por sulmuesit vendas tregohen shumë të ngathët në finalizim në disa raste, dhe në disa momente të tjera u mungon fati për të përmbysur rezultatin.
