Real Madrid ka triumfuar për të 13-ën herë në Champions League dhe për të tretën herë radhazi duke shkruar historinë në finalen e Kievit dhe të katërtin në pesë vitet e fundit. Rekord historik edhe për trajnerin Zinedine Zidane, që e fiton Champions për herë të tretë radhazi, si askush tjetër në të kaluarën.
Pjesa e parë ishte e qetë dhe me një Lioverpool më kërkues, por i paqartë kur vinte momenti para portës. Kur u mbush gjysmë ore lojë, Sergio Ramos dëmtoi Mohamed Salah, duke nxjerrë shpatullën e egjiptianit, në një aksion ku nuk u dha as faull dhe do të diskutohet për një kohë të gjatë nëse spanjolli e bëri qëllimisht apo jo.
Egjiptiani u përpoq të duronte dhimbjen dhe u rikthye në fushë, por ishte e padurueshme dhe nuk rezistoi për më shumë se 5’ minuta. Në minutën e 31-të ai u zëvendësua me Lallana dhe faktikisht rrezikon edhe praninë në Kupën e Botës 2018, pasi dëmtime të tilla duan deri në 6 javë kohë riaftësim.
Pjesa e dytë fillon me spektakël, vetëm 5’ minuta nga starti është portieri i Liverpool Karius që gabon dhe Benzema i vjedh një top mjaft mirë dhe e dërgon në rrjetë. Ky i fundit e përplasi topin në këmbët e Karim Benzema, për habinë e të gjithëve. Ky ishte goli i parë i një francezi në finalen e Champions, që pas Zidane në vitin 2002.
Gjithsesi, katër minuta më vonë, gjatë një goditje nga këndi, anglezët u përgjigjën me barazimin e shënuar nga Saido Mane.
Por më pas Zidan hedh në fushë një Bale të “çmendur” që shënon dhe gola të tillë. Pas krosimit të Marcelo, uellsiani, që kishte vetëm tre minuta në fushën e lojës, shënoi me roveshatë një gol të mrekullueshëm, ndoshta më të bukurin në historinë e finaleve të Champions League.
Nëntë minuta para fundit, një gafë tjetër qesharake nga Karius vulosi fatet e ndeshjes. Bale goditi nga rreth 30 metra dhe topi përfundoi në rrjetë, pasi duart prej “gjalpi” të portierit të Liverpool nuk mundën të ndalin topin. Një paraqitje skandaloze e tij…
