The Associated Press
Autoritetet shëndetësore po përpiqen të përcaktojnë nëse inflamacioni i zemrës që mund të ndodhë së bashku me shumë lloje të infeksioneve mund të jetë gjithashtu një efekt anësor i rrallë tek adoleshentët dhe të rinjtë pas dozës së dytë të vaksinës COVID-19.
Një artikull rreth shtatë djemve adoleshentë amerikanë, në shtete të ndryshme, botuar në internet të premten në ‘Pediatrics’, është ndër raportimet më të fundit të inflamacionit të zemrës të zbuluar pas vaksinimit me dozën e dytë të COVID-19, megjithëse një lidhje me vaksinën nuk është treguar.
Djemtë, nga mosha 14 deri në 19 vjeç, morën injeksione me Pfizer në prill/maj dhe përjetuan dhimbje në gjoks brenda pak ditësh. Testet e imazheve kardiake treguan një lloj inflamacioni të muskujve të zemrës të quajtur miokardi.
Askush nuk u sëmur rëndë. Të gjithë ishin mjaft të shëndetshëm dhe u dërguan në shtëpi pas dy deri gjashtë ditësh në spital dhe “po shkojnë shumë mirë“, sipas asaj që tha Dr. Preeti Jaggi, një specialiste e sëmundjeve infektive në Universitetin Emory e cila ishte bashkëautor i raportit.
Ajo tha se nevojitet më shumë monitorim për të përcaktuar se si po ecin të shtatë, por që ndryshimet në zemër ka të ngjarë të kenë qenë të përkohshme.
Vetëm një nga shtatë djemtë në raportin e ‘Pediatrics’ kishte prova të një infektimi të mundshëm të mëparshëm COVID-19 dhe mjekët konstatuan se asnjëri prej tyre nuk kishte gjendje të rrallë inflamatore të lidhur me koronavirusin.
Sipas AP ky lloj i inflamacionit të zemrës mund të shkaktohet nga një larmi infeksionesh, duke përfshirë një sulm COVID-19, si dhe disa ilaçe – dhe ka pasur raportime të rralla që ndjekin lloje të tjera të vaksinimeve.
Shënim: Departamenti i Shëndetit dhe Shkencës i ‘Associated Press’ mbështetet nga Departamenti i Edukimit Shkencor i Institutit Mjekësor Hoëard Hughes. AP është i vetmi përgjegjës për të gjithë artikullin.
