Maqedonia ka hyrë në heshtje zgjedhore. Pas fushatës dy javore elektorale për zgjedhjet vendore, partitë politike nuk kanë të drejtë të transmetojnë asnjë mesazh politik. Ndërsa nesër votuesit do t’u drejtohen kutive të votimit.
Megjithatë, në syrin e analistëve, këto zgjedhje nuk pritet të sjellin ndonjë ndryshim themelor për vendin. LSDM është fituese e këtyre zgjedhjeve, pasi fitoi Shkupin në raundin e parë, ndërsa VMRO-DPMNE pësoi humbje të thellë.
Nga kampi politik shqiptar, raundi i dytë është vendimtar, pasi shumica prej 16 komunave janë ende në lojë. BDI, e cila ishte e vetmja që siguroi fitoren në raundin e parë dhe arriti të triumfojë në dy komuna.
Pas balotazhit, do të votohet për 35 komuna, ku LSDM dhe VMRO-DPMNE do të garojnë në 20 komuna, ndërsa partitë shqiptare 15 të tilla.
Analisti politik Naser Ziberi thotë se nuk do të ketë ndryshime të mëdha tek kampi politik maqedonas, pasi sipas tij, shumicën e komunave pritet ta fitojë sërish LSDM-ja. Ndërsa shton se zhvillime interesante do të ketë në komunat e banuara me shqiptarë.
“Në kampin maqedonas fitorja në raundin e parë do të ketë ndikim në balotazh dhe LSDM do të fitojë edhe disa komuna tjera, ndërsa më interesante gara do të jetë tek partitë shqiptare, pasi që në disa komuna kemi gati balancim të forcave, pas koalicionit të arritur midis partive më të mëdha shqiptare Aleanca për Shqiptarët dhe Lëvizja BESA kundër BDI-së, e cila e ka përkrahjen e LSDM”, theksoi Ziberi.
Sipas tij, nëse blloku opozitar shqiptar fiton më shumë komuna, atëherë ato do të kërkojnë zgjedhje të parakohshme parlamentare.
Në raundin e parë nga 45 komuna, 38 i fitoi LSDM, VMRO-DPMNE 3 komuna, BDI 2 dhe komunat e tjera kandidatë të pavarur. Këto janë zgjedhjet e gjashta vendore që zhvillohen në 80 komuna dhe Qytetin e Shkupit si njësi e veçantë.
