Familja e të ndjerit George Floyd, i cili u vra nga policia në SHBA kanë vendosur t’i bëjnë një autopsi private për të zbuluar shkaqet e vdekjes së tij.
Autopsia zyrtare paraprake e kryer nga ekzaminuesi mjekësor i qarkut nuk gjeti prova të “asfiksisë traumatike ose mbytjes”. Por autopsia e zhvilluar nga mjekët e punësuar nga familja tregon se Floyd vdiq për shkak të shtypjes së ushtruar në qafë dhe shpinë nga oficerët e policisë në Minneapolis.
“Shkaku i vdekjes për mendimin tim është asfiksia, për shkak të shtypjes së ushtruar në qafë – e cila mund të ndërhyjë në oksigjenin që shkon në tru – dhe shtypjes së ushtruar në shpinë, e cila ndërhyn në frymëmarrje”, tha Michael Baden, ish-mjek i New York City.
Prej ditësh tashmë, Shtetet e Bashkuara janë përfshirë nga protesta masive që po zgjerohen gjithmonë e më shumë.
Protestat erdhën pas vdekjes së një afro-amerikani gjatë arrestimit nga policia. Në rrjetet sociale u bë virale një video e George Floyd, i cili qëndronte me fytyrën në tokë, ndërsa një polic kishte vendosur gjurin në qafën e tij.
Pavarësisht thirrjeve të tij se nuk po merrte frymë, polici nuk u ndal, deri sa Floyd ndërroi jetë.
