Ngacmime seksuale, dhunë fizike e deri në përdorim armësh zjarri e të ftohta. Këto janë disa nga problematikat që ka nxjerrë raporti Agjencia e Sigurimit të Cilësisë së Arsimit Parauniversitar për vitin shkollor 2020-2021. Edhe pse nëpër shkollat 9 vjeçare dhe në gjimnaze janë të vendosur oficerët e sigurisë, sërish incidentet dhe problematikat kanë qenë të shumta. Sipas raportit, oficerët e sigurisë në shkolla, edhe pse kanë raportuar problematikat, nuk kanë arritur të jenë një siguri e plotë nëpër shkolla. Incidentet e theksuara në raport janë dhënë nga 150 oficerët e policisë në shkollat ku shërbejnë, por ehde nga mësues apo prindërit.
Raporti evidenton se rrethi me më shumë problematika të raportuara nëpër shkolla për çdo Drejtori Rajonale të Arsimit Parauniversitar është Durrësi me 34%. Ndërsa në Fier u shënuan më pak incidente mes nxënësve. Tetori 2020 ka qenë muaji më problematik. Ka qenë pikërisht kjo kohë që ka përkuar me kthimin e nxënësve në shkolla pas ndalimit prej pandemisë. Numrin rekord të raportimeve e kanë bërë ata që e kanë për detyrë sipas raportit pra oficerët e sigurisë, me 239 raste, më pas kanë qënë mësuesit që kanë sinjalizuar dhe vetë nxënësit e dëmtuar.
Dhuna fizike, me 139 raste të raportuara, rezulton të jetë problematika më e madhe. Sipas raportit rezulton edhe se dy nxënës kanë përdorur armë të ftohta në mjediset e shkollës ndërsa tre nxënës kanë sulmuar me armë zjarri gjatë vitit shkollor 2020-2021. Janë raportuar edhe tre ngacmime seksuale, 13 nxënës janë shantazhuar dhe kërcënuar, ka patur edhe tre raste tentativë vetëvrasje nga nxënësit. Në 119 raste incidenti u raportua jashtë ambienteve të shkollës, 102 raste brenda në klasë, 68 në oborrin e shkollës dhe 16 raste në tualet.
Shumicën absolute të problematikave, me 92% të rasteve të raportuara e mbajnë gjimnazistët, ndërkohë që 8% e problematikave u përket nxënësve të shkollave 9 vjeçare. Në 191 raste nxënësit e dëmtuar kanë vrapuar tek oficeri i tyre i sigurisë duke treguar se ata janë personat më të besuar kur adoleshentët dhe fëmijët ndodhen në “hall” kur janë brenda mureve të shkollës. 66.6% e incidenteve/problematikave janë zgjidhur plotësisht në momentin e raportimit të tyre. Këto rezultate i referohen të dhënave në momentin të raportimit. Pasi rasti është ndjekur dhe monitoruar nga oficerët e sigurisë këto vlera kanë pësuar ndryshime të mëtejshme. Raporti i ASCAP-së paraqet edhe si më problematikën klasën e dhjetë./Tirana Today
