Kryeministri Rama, ka reaguar me anë të tre statuseve në Twitter lidhur me raportin e OSBE-ODIHR-it, për zgjedhjet e 30 qershorit. Ai thotë se është e kotë për të bërë zhurmë, pasi raporti ka certifikuar zgjedhjet si krejt legjitime, e ka dhënë rekomandime në shërbim të reformës që na duhet. Për rrjedhojë, sipas Ramës, kjo përpjekje për të ngritur një furtunë në gotë është veçse e kotë, e gabuar e mbi të gjitha e dëmshme për vendin.
Ndonëse raporti ishte i mbushur me kritika për 30 qershorin, Rama citon se ODIHR-i i certifikoi zgjedhjet lokale.
“Përpjekja për të ngritur një furtunë në gotë mbi Raportin e OSBE/ODHIR-it është e kotë, e gabuar dhe e dëmshme për vendin, e në radhë të parë për opozitën joparlamentare! Raporti ka çertifikuar zgjedhjet si krejt legjitime, e ka dhënë rekomandime në shërbim të reformës që na duhet!
Zgjedhjet e 2021 nuk janë larg për kohën që duhet për adresimin e rekomandimeve në funksion të Reformës Zgjedhore. Prandaj le të fokusohemi tek kjo reformë themelore dhe të përgatisim me frymë DIALOGU e BASHKEPUNIMI, zgjedhjet e ardhshme. Dora jonë është e shtrirë për të gjithë.
Çdo vonesë e kotë sot e bën më të vështirë arritjen e një rezultati domethënës, në adresimin e problematikës së evidentuar përmes rekomandimeve. Ne presim, po koha nuk pret qytetarët tanë pa dallim, presin prej nesh të hapim një faqe të re DIALOGU e BASHKEPUNIMI për Shqipërinë”.
