Tirana vazhdon të jetë qyteti më i ndotur në rang vendi. Ky është përfundimi i arritur në Raportin e Gjendjes së Mjedisit në Shqipëri 2016, publikuar nga Agjencia Kombëtare e Mjedisit. Në raport thuhet se problematike pas Tiranës mbeten qytetet e Fierit, Lushnjës dhe Lezhës.
Ndërkohë, Korça është problematike kryesisht në dimër për shkak të ngrohjes me dru zjarri.
Pas cilësisë së ajrit, zhurmat janë niveli i dytë i riskut për shëndetin publik. Edhe këtu Tirana është ndër qytetet më problematike kur gjatë ditës është 17.23%më lart se norma e lejuar dhe gjatë natës 24.91% më lart se norma e lejuar nga OBSH.
Në monitorimin e ujërave sipërfaqësorë për vitin 2016 ka një përmirësim të ndjeshëm të ujërave larës bregdetarë edhe pse 5 pika ende mbeten problematike.
Në analizimin e kësaj situate, Beqiri shtoi se: “vazhdon mungesa e informimit dhe e infrastrukturës nga pushteti vendor në këtë pikë”.
Në Raport nuk kanë ndryshim në krahasim me vitin 2016 cilësia e ujërave sipërfaqësorë në lumenj dhe liqene si edhe cilësia e ujërave nëntokësorë.
“Pavarësisht ndarjes së re territoriale, bashkitë po bëjnë ende një punë të dobët, në drejtim të ndotjes e menaxhimit të mbetjeve”, u shpreh kreu i AKM-së duke iu referuar rezultateve të monitorimit të menaxhimit të mbetjeve për vitin 2016.
Raporti konstaton rezultate pozitive të vitit të parë të moratoriumit 10-vjeçar të pyjeve:
“Moratoriumi do të sjellë padyshim një ripërtëritje të mbulesës së tokës. Ndërkohë që janë konstatuar 15 specie drunore në rrezik zhdukje”, tha Beqiri.
Ndër të tjera, kreu i AKM-së, Julian Beqiri theksoi rënien e buxhetit thuajse me gati përgjysmimin e tij:
“Buxheti i Agjencisë Kombëtare të Mjedisit nga viti 2014 në vitin 2017 ka ardhur në rënie të ndjeshme me gati përgjysmimin e tij. Pavarësisht buxhetit, monitorimi nga 2014 në 2017 sipas treguesve është një performancë në rritje të ndjeshme në çdo komponent,” deklaroi ai.
Raporti i Gjendjes së Mjedisit në Shqipëri 2016 by Tirana Today on Scribd
