Analisti Ilir Demalia, në një lidhje me skype për studion e lajmeve të “Ora News”, ka thënë se Ramës i ka ngordhur kali i pushtetit. Sipas tij, ndryshimet në kabinetin qeveritar, i sheh të parëndësishme. Në analizën e tij, analisti është i mendimit se kryeministri Rama e ka të kotë që të ndërrojë karrocierët, për të shtyrë edhe më tej karrocën e Rilindjes. Pushteti për të është i rrënuar. Por jo më pak i ashpër është edhe me opozitën, që sipas tij, po fle ende gjumë.
“Ramës në këtë situatë nuk ka fare rëndësi ndërrimi i ministrave. Ramës i ka ngordhur kali i pushtetit, dhe ai mendon se duke ndërruar karrocierët, do të shtyjë karrocën e Rilindjes më tej, për të vazhduar pushtetin e tij dhe oligarkët e krimit që ai mbështet.
Shteti i pushtetit korruptiv, klientelist të oligarkëve të rrethit të kryeministrit, dhe karrocierëve qeveritarë, është tashmë i rrënuar si funksionim shtetëror, por nuk ka një ruspë opozitare që të rrëzojë këtë gërmadhë shtetërore. Kjo është kriza më e rëndë, kjo është kriza më e rëndë se vetë kryeministri Edi Rama”.
