Lajm aspak i mirë për punonjësit e administratës publike. Kreu i qeverisë,Edi Rama, ka firmosur një urdhër për të gjithë punonjësit e administratës publike, që ende nuk kanë paguar faturat e ujit, ndërsa në dispozicion kanë edhe 30 ditë për të shlyer detyrimet e prapambetura.
Në urdhër, sqarohet së institucionet publike kanë 30 ditë afat për të lidhur kontratat e rregullta me ujësjellësat. Nga ana tjetër të gjithë ata që kanë detyrime të papaguara, duhet të nënshkruajnë marrëveshjen me ujësjellësin dhe më pas të shlyejnë detyrimet që iu takojnë.
Institucionet do të hyjnë në “sitën” e shtetit, ndërsa nuk përjashtohen edhe punonjësit e tyre. Urdhri parashikon që çdo punonjës institucioni, duhet me patjetër të dërgojë kontratën e furnizimit me ujë të pijshëm.
Kontratat që dërgohen, do t’i nënshtrohen një kontrolli dhe do të përcaktohen se debitorët që nuk kanë një marrëveshje duhet të shpejtojnë për të lidhur një kontratë, përndryshe ballafaqohen me sanksionet apo detyrimet ligjore.
