Rama ka paralajmëruar se sot do të ketë një operacion të suksesshëm. Deklaratat i bëri një ditë më parë, gjatë një takimi me gra dhe vajza në Laprakë, ku foli për mbylljen e kazinove. Ai tha qartazi se do të jenë të ashpër me të fortët. Kryeministri Rama foli edhe për zbatimin e ligjit, duke mos bërë përjashtime.
“Këta të fortët me lidhje të forta kriminale, do të jemi shumë të ashpër me të fortët. Nesër besoj publiku do të njihet me një tjetër operacion të suksesshëm, dhe do të vazhdojë deri sa i forti i fundit ta kuptojë se nuk ka të fortë në këtë vend. Pasi del nga shtëpia, i fortë është komuniteti. Ne do ti detyrojmë o të vihen në resht dhe të respektojnë ligjin e këdo qoftë, ose ka vetëm një vend për ta. Aty ku shkuan sot ata që janë aty brenda”, tha Rama.
Vallë a do ta mbajë premtimin Rama?
Ai foli me një gjuhë të ashpër në mbledhjen me dyer të mbyllura të Grupit Parlamentar Socialist, ndaj drejtuesve në krye të disa institucioneve të rëndësishme. Kryeministri madje nuk kurseu edhe gjuhën e sertë ndaj drejtorave, duke i cilësuar si legena.
“Kemi ca drejtorë legena, që po na nxijnë fytyrën me korrupsion e keqmenaxhim”, është shprehur para deputetëve.
Rama ka thirrur sot një mbledhje të kryesisë socialiste, ku përveç të tjerave do të kërkohet dhe një analizë në lidhje me performancën e punës së drejtorëve të rëndësishëm të emëruar prej tij, apo ministrave të qeverisë. Por pritet që mbledhja e sotme e kryesisë socialiste të analizojë dhe punën e çdo sekretari në lidhje me vendimet që mori Asambleja Kombëtare e PS-së më 7 shtator, dhe që lidhet me përgatitjet e partisë për zgjedhjet e ardhshme lokale.
