Përballë studentëve të universitetit Bujqësor në Tiranë, Rama u shpreh se megafoni nuk është i nevojshëm, kur nuk të dëgjon njeri. Me ironi, ai tha se studentët e sotëm janë shumë larg studentëve të dhjetorit të parë, pasi ata zgjodhën të bisedonin në tavolinë me përfaqësuesin më të lartë të diktaturës. Po kështu, Rama i kujtoi studentëve se në këtë formë proteste, ata rrezikojnë të humbasin me duart e tyre gjithçka kanë krijuar.
“Refuzimi për të folur nuk është argument, e folura me forcë pa argument nuk është vlerë e shtuar. Dhe në fund të ditës, mua më duket që jeni shumë larg nga ata studentët e atij dhjetorit tjetër.
Jeni tmerrësisht larg, sepse ata studentët e dhjetorit tjetër u ngritën kundër një regjimi, që edhe mund të nxirrte tanket në rrugë.
Kërkuan të flasin në tavolinë, dhe i vajtën përballë përfaqësuesit me të lartë të diktaturës, dhe ia thanë çfarë kishin për të thënë e në fund fare fituan.
Unë e kuptoj që mund të mos biem dakord, po duke mos folur s’kemi si i zgjidhim problemet.
Me atë variantin plotëso këto, se ne nuk flasim? Asnjëherë.
Rrezikoni të humbni me duart tuaja diçka që e krijuat vetë, si burim i një energjie te madhe pozitive për universitetin.
Problemet janë shumë më të gjëra se ato 8 pika. Çdo universitet ka specifikat e veta. Doni ti trajtoni këto, apo doni të duartrokisni ato që dalin jashtë”, u shpreh Rama.
