Në konferencën “Sfidat e Emigracionit”, kryeministri Edi Rama nga Pallati Kongreseve, ka deklaruar se ka rënë numri i shqiptarëve që largohen nga vendi.
Kreu i qeverisë shqiptare solli shembullin e Kroacisë, për të treguar se emigracioni është një fenomen edhe i vendeve më të reja të Bashkimit Evropian.
Sipas Kryeministrit, në vitin 2017 nga Kroacia janë larguar 50 mijë qytetarë, ndërsa nga vendi ynë kjo shifër është më e ulët për të njëjtin vit, rreth 40 mijë.
Por, qytetarët e Kroacisë apo të vendeve më të reja të BE-së që emigrojnë nuk shënohen si azilkërkues, pasi janë pjesë e unionit dhe lëvizjes së lirë, ndryshe nga shqiptarët.
“Duket sikur janë vetëm shqiptarët apo banorët e tjerë të rajonit që largohen dhe lëvizin në drejtim të vendeve më të zhvilluara, ndërkohë që kjo është larg së qeni e vërtetë. Nëse të gjitha vendet e reja të Bashkimit Evropian, do të shohim se e vërteta është krejt ndryshe. Arsyet për t’u larguar sot për shqiptarët nuk janë arsye të natyrës politike, por janë të njëjtat arsye për të cilat largohen nga vendi i tyre polakët, rumunët apo kroatët.
Vetëm vitin e kaluar, nga Kroacia që është vendi anëtar i BE janë larguar 50 mijë njerëz, 90% të reja dhe të rinj. Por ndryshe nga ne shqiptarët, ata nuk shënohen si azilkërkues sepse janë forca të lira pune. Nëse 50 mijë njerëz janë larguar nga Kroacia anëtare e BE në vitin 2017, nga Shqipëria janë larguar 39.905, ndërkohë që janë kthyer 25 mijë. Në Italinë e jugut fenomeni i largimeve është një fenomen tashmë kronik”, u shpreh Kryeministri Rama.
Kreu i qeverisë theksoi se numri i emigrantëve apo azilkërkuesve shqiptarë ka ardhur në rënie në harkun kohor 2011-2017. Shifrat më të fundit nga Censusi tregojnë se krahasuar me vitin 2013, numri i shqiptarëve që emigrojnë ka rënë me 20%, ndërsa ka rënie akoma më të madhe në krahasim me 2011.
