Kryeministri Edi Rama ka thyer heshtjen duke komentuar pas disa ditësh çështjen Tahiri, për të cilën nuk kishte folur që nga gjetja e patentave në automjetin e Orest Sotës.
Teksa opozita ka këmbëngulur duke pyetur Ramën se përse nuk flet për ish-deputetin e PS-së dhe ish-ministrin Tahiri, kryeministri ka zgjedhur që të përgjigjet sot nga foltorja e Kuvendit, teksa tha se nuk i takon atij të flasë për Saimir Tahirin, pasi ai po hetohet.
“Më thua kam 4 javë unë që nuk flas për Saimir Tahirin. Po ça t’flas unë për Saimir Tahirin? Po ça t’them për Saimir Tahirin? Detyra ime është, apo është e jotja? As e imja, as e jotja. Është detyra e atyre e që po e hetojnë Saimir Tahirin. Dhe nuk t’ka caktuar njeri ty të bësh as gazetarin as prokurorin, as gjykatësin. E bën sepse pushteti është e vetmja gjë që të intereson dhe për pushtetin je në gjendje ta bësh llum çdo gjë. Je në gjendje të fusësh llumin në veshin e çdo njeriu, me të vërteta, me të pavërteta. Me ca të jetë! Nuk të intereson asgjë tjetër. Ndërkohë që unë them që jemi shumë ndryshe. Unë them që jemi shumë ndryshe, unë dhe ti, Beqja të ka ftuar të provosh në gjykatë ato që ke thënë për të, avokati i thotë nuk ka gjë Luli me Ilirin, këto janë politike dhe mbrohesh si skuthat me statusin e gazetarit. Gazetar je ti, kriminalizon këdo dhe mbrohesh si gazetar. Unë nuk bëj dot atë që bënte Saliu me ty, kur ishe akuzuar nga prokuroria, unë s’e kam bërë kurrë dhe nuk kam për ta bërë”, tha Rama ndër të tjera.
