Në mbledhjen e sotme të Grupit Parlamentar të Partisë Socialiste, kryeministri Edi Rama mbështeti nismën e socialistëve për të kërkuar shkarkimin e kreut të KQZ-së. “Fakti që ai ka në xhep teserën e Partisë Demokratike nuk e bën të jetë mbi ligjin”, tha kreu i qeverisë.
Gjithashtu Rama tha se duke kërkuar shkarkimin e Klement Zgurit, do t’i hapet rrugë pas edhe shkarkimit të kryebashkiakut të Mallakastrës Agron Kapllanaj, i dënuar në Itali.
“Unë e mbështes plotësisht nismën e kryetarit të grupit për të filluar procedurat e shkarkimit të kryetarit të KQZ-së, ndërkohë që së bashku me ekspertët e Kryeministrisë po gjykohet edhe mundësia e shkarkimit të kryetarit të Bashkisë së Mallakastrës si një entitet i gjykuar nga gjykatat italiane që përbën subjekt të ligjit të dekriminalizimit. Fakti që ka teserën e Partisë Demokratike nuk e bën as me imunitet ndaj ligjit dhe as virgjëreshë në raport me veprat penale që ka kryer dhe është dënuar nga autoritetet italiane”, tha kryeministri.
