Kryeministri Edi Rama tha sot se Polonia është një model zhvillimi dhe transformimi që duhet ndjekur. Gjatë një konference të përbashkët me kryeministren e Polonisë Beata Szydlo, Rama deklaroi nga Varshava se është i bindur që Polonia do të mbështesë Shqipërinë për çeljen e negociatave me BE-në.
“Kjo është një vizitë historike e marrëdhënieve midis dy vendeve tona. E konsiderojmë Poloninë një model në zhvillimin e saj nga një vend i perandorisë komuniste në një prej vendeve me rrezatim të fortë në BE. I jemi mirënjohës Polonisë për mbështetjen e vazhdueshme për të ardhmen evropiane të vendit tonë. Jam i bindur që kryeministrja do të jetë një mbështetëse për çeljen e negociatave me BE në 6 mujorin e parë të 2018. Sot është 80 vjetori i fillimit të marrëdhënieve të dy vendeve tona. Ndërkohë shtypi polak shkruante se kemi një rifillim të marrëdhënieve midis dy vendeve tona pasi atë rikujtonin bashkëpunimin me heroin tonë kombëtar Skënderbeun. Kryeministrja preku turizmin si një nga pikat më domethënëse të kohëve të fundit. Ka një potencial të madh të pashfrytëzuar në marrëdhëniet tona ekonomike e tregtare. Unë do e shfrytëzoj këtë mundësi për të ndarë me opinionin publik polak, se këtë vit Shqipërinë e kanë vizituar 74% më shumë turistë polakë se vitin e kaluar, prandaj inkurajoj kryeministren për linjën ajrore direkte të fluturimeve drejt Shqipërisë, që do sillte përfitueshmëri reciproke. Diskutuam edhe për propozimin e saj për konferencës e Tiranës që ne e mirëpresim me respekt. Ne do t’i jemi mirënjohës Polonisë për mbështetjen për të ardhmen Evropiane të vendit tonë. Jam i bindur që kryeministrja do të jetë një ndër mbështetësit e mëdhenj të çeljes së negociatave me BE të Shqipërisë“, deklaroi Rama.
Kryeministren e Polonisë Beata Szydlo tha se Komisioni Evropian do të njohë progresin e reformave të Shqipërisë dhe se bashkëpunimi i ndërsjellët midis dy shteteve do të vijojë.
