Kryeministri Edi Rama po zhvillon një takim me sipërmarrësit, të cilëve u kërkoi ndihmë për të luftuar ata që i quajti “grabitqarët dhe parazitët e administratës”.
Rama vlerësoi rolin e sipërmarrësve, ndërsa theksoi se duhet ndihma e tyre për të luftuar korrupsionin në mënyrë që të rritet ekonomia mbi 5% deri në 2019-ën.
FJALA E RAMËS:
Miku më i fortë të jetë qeveria dhe të mos ketë nevojë për miq, as në tatime, as në dogana asgjëkundi tjetër.
Ju të parët nëse do hapnit zemrën jeni të vetëdijshëm se sa shumë grabitqarë dhe parazitë ka në administratën shtetërore. Duhet të jeni të parët që këta t’i luftojmë së bashku.
Është e mundur që këta qeveria t’i luftojë edhe pa ju, por do kërkojë shumë kohë dhe do ketë shumë plagë në trupin tuaj.
Ministrja e shtetit është në qeveri për t’ju mbrojtur nga qeveria, duke filluar nga ministri i Financave që mund të mos jetë në dispozicionin tuaj.
Ne jemi të vetëdijshëm që Shqipërinë do ta ndërtojmë vetëm së bashku me ju. Ne jemi të bindur që në një proces që ne e kemi nisur, reduktimi drastik i dokumenteve, burokracive etj do të sjellë një tjetër faktor shtytës për ta shtyrë sipërmarrjen që të merret me gjërat që duhet. Ne jemi të dëshiruar që ju të jepni kontributin tuaj dhe të bëni propozimet e tuaja se çfarë dokumentesh duhet të hiqen në marrëdhënie me shtetin.
Nuk mendoj se është e denjë që ju të zgjidhni rrugën e shkurtër dhe të bëheni palë më korrupsionin në sistemin qeverisës. Ka 1001 arsye për të dëgjuar e për të thënë se realiteti është ndryshe, ose thoni “pse t’i hyj kësaj pune e të merrem me lloj-lloj hakmarrjesh ndërkohë që i bie shkurt”.
Përkundër këtyre, dua t’ju përsëris se duhet të na vini në provë. Nëse nuk është kështu siç ju them është e drejta juaj të ktheheni te rruga e vjetër e t’i zgjidhni çështjet te zona e errët e administratës.
Asnjë zyrtar të mos guxojë të ngacmojë askënd prej jush me hijen e njeriut që të merr peng për të marrë një ryshfet dhe nga ana tjetër për të krijuar më shumë soliditet dhe për të ulur së bashku informalitetin.
Kemi bërë progres, por është i pamjaftueshëm që nga prokurimet. Besoj që ju keni eksperienca të jashtëzakonshme në budallallëqet e administratës dhe marrëzitë që kërkohen prej jush kur duhet të mbushni një dokumentacion.
Të gjithë doganierët do largohen brenda 100 ditëshit, se ça ndërmjetësojnë ata unë s’e kam marrë kurrë vesh po shyqyr që na e dha populli mandatin vetëm që të mos kemi merakun se ngacmojmë ndonjë.
Me ata zhabulanë atje që me demek se ndërmjetësojnë proceset midis shtetit dhe sipërmarrësve.
Shëmtojnë pamjen jo më të tjerat, një tufë sekserësh sidomos në portin e Durrësit. Inspektoriatet kanë marrë urdhër që të mos vendosin asnjë gjobë deri kur të bëhet ristrukturimi. E vërteta është që janë banda që lëshohen në mbrojtje të mjedisit. I bien në qafë çdo njeriu që bën një punë, çdo njeriu që merr një kazëm për të punuar. Këta duhet t’i largohen nga qafa popullin shqiptar.
Përveç tatimeve dhe doganave që do vazhdojnë normalisht./ Tirana Today
