Kryeministri Edi Rama po mban një takim me disa qytetarë, të cilët kishin gjetur zgjidhje të halleve të tyre në portalin “Shqipëria që duam”.
Rama bëri thirrje që të gjithë qytetarët të drejtonin ankesat e tyre në këtë portal, ndërsa nuk denjoi të përmendte edhe protestën e studentëve.
Teksa dëgjonte një ekonomist nga Vlora, i arsimuar jashtë vendit dhe me disa master, kreu i qeverisë tha se “fjalën master e kishte dëgjuar shumë herë, madje deri në orën 3 të mëngjesit”.
“E kam dëgjuar më shumë se gjelat e Surrelit”, shtoi Rama mes të tjerash, ndërsa tha se ata që duan përjashtim nga tarifa e masterit do të duhet të dalin me rezultate të mira.
“Meqë përmendët fjalën master, se e kam dëgjuar deri në 3 të mëngjesit. E kam dëgjuar shumë më tepër sesa të gjithë gjelat e Surrelit pak më vonë. Dua ta theksoj se ska asnjë mundësi dhe nuk është e drejtë që të ndërhyhet financiarisht me mbështetje nga taksa-paguesit për masterin. Ne kemi bërë një përjashtim nga tarifa e masterit për ata që janë me 9-10”, tha Rama.
