Kryeministri Edi Rama ka sulmuar sërish presidentin Meta, të cilit duket se nuk ka ndërmend t’i ndahet me akuza, që prej vendimit të tij për të shfuqizuar zgjedhjet e 30 qershorit.
Rama ka vijuar fushatën elektorale pavarësisht këtij vendimi, ndërsa nga Pusteci tha se shqiptarët ndihen të turpëruar nga Meta, i cili në vend që të lobojë për integrimin e Shqipërisë, ai punon kundër integrimit.
Kryeministri përsëriti batutat me filxhanin, duke iu referuar Kryemadhit, ndërsa shtoi me ironi se presidentit Meta nuk i kushton asgjë që të ndalojë kafen turke në shtëpi deri më 30 qershor.
“Presidenti i Maqedonisë së Veriut sot po punon fuqishëm që vendi i tij të integrohet e të çelen negociatat. Fatkeqësisht s’mund të themi të njëjtën gjë për presidentin tonë, i cili në vend që të punojë pro, po përpiqet që Shqipëria të mos integrohet.
Presidenti na bën të gjithëve të na vijë zor, të ndihemi të turpëruar. Është diçka që Shqipëria nuk ia ka borxh Ilir Metës, i cili sot nuk duhej të merrej me filxhanin e fallxhores po me përpjekjet për të takuar homologë në komunitetet evropian,e për të folur për integrimin e vendit.
Dhe të merrej me qetësimin e fallxhores dhe të ndalonte kafen turke në shpi deri më 30 qershor. Të merrej me ndalimin e doktorit që nuk lë rast pa u krenuar se e ka mik, e doktori të urdhëronte Lulin që të mos dilte më nga shtëpia derisa të përfundonin zgjedhjet. Se Luli bën çfarë i thotë doktori.
Ça i kushtonte Ilir Metës të ndalonte kafen turke, mjafton ta ndalonte dhe s’kishte më situata turpi duke i tmerruar shqiptarët se do bëhet 97-a etj etj”, tha kryeministri ndër të tjera. / Tirana Today
