Shpërndarja e lejeve të legalizimit në çdo qark të vendit ka qenë një nga çështjet që kryeministri Edi Rama i ka dhënë një rëndësi parësore, përgjatë këtij mandati 4-vjeçar që përmbyllet në zgjedhjet e 18 qershorit.
Për këtë arsye, kryeministri Rama ka vendosur t’i “shpërblejë” drejtorët e agjencive të Legalizimit, Urbanizimit dhe Integrimit të Zonave/Ndërtimeve Informale në qarqet e vendit, duke i përfshirë ata në listat e kandidatëve për deputetë.
Duke e cilësuar si me rëndësi për tërheqjen e elektoratit dhe thithjen e sa më shumë votave, kryeministri Rama ka përfshirë në listë për deputetë në Qarkun e Elbasanit, Mariglen Dishën. Disha, i cili aktualisht drejton Agjencinë e Legalizimit për këtë qark, renditet i 17-ti në listën e përgjithshme.
Sa i përket Qarkut të Shkodrës, Rama ka menduar të kandidojë ish-drejtorin e ALUIZNIT për këtë qark, Luan Harusha. Harusha renditet i katërti në listë dhe cilësohet si një kandidaturë potenciale për të fituar dhe për grumbulluar sa më shumë vota nga elektorati i Shkodrës.
Sa i përket Qarkut të Tiranës, në të cilën është bërë puna më intensive dhe më e madhe për legalizimin e zonave informale, kryeministri Rama ka përfshirë në listën e kandidatëve për deputetë, drejtoren aktuale ALUZINIT për Tiranën, Besa Spaho. Spaho renditet e 28 në listë.
Në Qarkun e Fierit, Partia Socialiste do të kandidojë drejtorin e ALUIZNIT për këtë qark, Ervin Bushi. Nisur nga puna e realizuar prej Bushit në këtë qark, kryesia e PS-së e vendosi atë të 13-tin në listën e kandidatëve për deputetë.
