Ditën e sotme është mbledhur Komiteti i Menaxhimit të Emergjencave për normalizimin e situatës pas përmbytjeve.
Në fjalën e tij, Rama e vuri theksin te sigurimi i banesave dhe i bizneseve, duke shtuar se do të ketë një nismë ligjore që në raste të tilla, dëmshpërblimi të sigurohet nga siguracioni.
Kryeministri tha se qeveria nuk mund të përballojë çdo situatë të tillë përmbytjesh, por edhe këtë herë, ajo do sigurojë kompensimin e familjeve dhe bizneseve të prekura.
Nëse shqiptarët e prekur nga përmbytjet, që humbën gjithçka në pak orë ndihen të pashpresë, Rama e sheh gotën “gjysmë plot” teksa tha se pasojat do të ishin katastrofale në rast se nuk do të ishin bërë investime nga shteti.
“Do ndërhyjmë në pikat e dobëta të infrastrukturës. Do të kishte ndodhur një katastrofë nëse nuk do të ishin bërë investime.
Mbjellje me përparësi të pemëve në të gjithë ato zona ku ka pasur një dëmtim serioz të pyjeve duke sjellë erozion.
Është përparësi edhe hapja e shkollave të mbyllura, si dhe sigurimi i banesave e bizneseve nga përmbytjet. Jemi i vetmi vend që nuk ka një masë të tilla me ligj dhe ku pastaj njerëzit e prekur mbeten në mëshirën e fatit dhe në pritje vetëm nga buxheti i shteti, i cili nuk mund të përballojë gjithçka, edhe pse ne edhe këtë herë do e përballojmë.
Është e rëndësishme që sipërmarrësit të sigurohen dhe të marrin masa dhe që dëmet të kompensohen. Për sa na takon, ne do bëjmë maksimumin. Është e rëndësishme të bashkëpunohet me prefektët, me pushtetin vendor. Tani është një fazë ku mediat spostohen në të tjera drejtime, por për ne është e rëndësishme që të vazhdojmë me normalizimin e gjendjes”, përfundoi Rama. TIRANA TODAY
