Kryeministri Edi Rama ka sfiduar shtetin serb, që ka dalë kundër bashkimit doganor të Shqipërisë me Kosovën. Gjatë një komunikimi me mediat në qytetin e Kukësit, kryeministri e ka bërë të qartë se ky bashkim doganor do të bëhet, i pëlqen apo jo Serbisë.
“Nëse Serbia do të bëjë bashkim doganor me ne, mund ta bëjë. Por, me Kosovën do e bëjmë, dhe nuk na ndalon askush. S’ka asnjë arsye përse të mos bëhet. Bëhet për të larguar burokracirat dhe për të mos penguar qytetarët. Kjo duhet të bëhet në të gjithë Ballkanin. Kemi një marrëveshje me Maqedoninë e Serbinë për t’i lehtësuar sa më shumë. Në Evropë, këta që na thonë se çfarë duhet bërë e s’duhet bërë i kanë kufijtë e lirë. Këtë duam të bëjmë edhe ne këtu,” tha Rama./ TIRANA TODAY
