Kryeministri Rama ka folur sot për herë të parë mbi vonesën e pagave të pedagogëve, të cilën e quajti një shembull të qartë se reforma është një sfidë për qeverinë.
I pranishëm në një takim me Senatin e Universitetit të Tiranës, Rama tha se universiteti e ka problemi me vetveten, ndërsa theksoi se qeveria e mbështet dhe monitoron universitetin, por nuk e qeveris atë.
Fjala e Ramës:
Askush nuk e merr peng reformën, as me shfaqje as me firma as me shqetësime, sado legjitime që të jenë. Problemi themelor i universitetit është me vetveten. Universiteti sot ka një sfidë të re që është autonomi e zgjeruar. Debati që do të doja të bëja sot është se çfarë duhet të bëjë qeveria për të garantuar këtë autonomi të zgjeruar.
Vonesa e pagave është një shembull shumë i qartë i faktit që reforma është sfidë edhe për ne që e kemi udhëhequr dhe kthyer në legjislacion. Sepse ne vetë si qeveri na ka munguar një debat midis ministrisë së Arsimit dhe asaj të Financave. Ministria e Arsimit me të drejtë këmbëngul që granti i pakushtëzuar trashëgohet dhe administrohet nga ministria e Arsimit, kurse ajo e Financës thotë se çdo vit duhet një miratim për grantin. U deshën disa ditë për të hapur rrugën e zgjidhjes dhe zgjidhja është që fondet trashëgohen dhe nuk varen nga ministria e Financës.
Është e rëndësishme që çdo debati brenda qeverisë t’i shkohet deri në fund. Çështja u zgjidh, por brenda saj ka edhe një sfidë. Granti i pakushtëzuar është i pamjaftueshëm,shkon në tërësinë e vet për të mbuluar një pjesë të konsiderueshme por jo plotësisht të pagave.
Ka 2 gjëra: ne na takon që grantin ta rrisim, por duke u bazuar te merita dhe performanca e universiteteve.
Unë s’e kuptoj kujt ia kërkoni zgjidhjen për probleme të brendshme, të ndërhyjë qeveria? Nuk ndërhyn dot. Kjo është autonomia juaj, flamurin e autonomisë e keni tundeni, ne nuk mbajmë monopolin e shkopit të flamurit. Ligji e ndan, rektori, dekani s’është llogaritar, është udhëheqës akademik, bordi ka përsipër procesin që ka të bëjë me financimin, mbarëvajtjen etj. Tani Universiteti i Tiranës është i vetmi ku shfaqen probleme, ndërkohe që shumicën në bordin e administrimit e ka zgjedhur vetë, qeveria aty është në minorancë. TIRANA TODAY
