Kryeministri Edi Rama duke folur nga Shkodra ku mori pjesë në ceremoninë e përurimit të rikonstruksionit të Urës së vjetër të Bunës, e shpallur Monument Kulture, vuri edhe një herë në dukje vështirësitë që ka hasur qeveria në komunikimin me kryetaren e Bashkisë Shkodër.
“Është fatkeqësi që kryetarja e Bashkisë, me gjithë ftesat e përsëritura nga unë dhe Ditmiri, nuk pranoi që të ishte prezente në këtë event”, tha Rama.
Teksa kujtoi debatin që ai e cilësoi si idiot, mbi pronësinë e Urës së vjetër të Bunës, Kryeministri u shpreh: “Të mos merremi me këmbët e prishura të urës së atyre që qeverisin sot Shkodrën, por me punët që kemi filluar dhe që do të ndryshojnë Shkodrën.”
Ai foli për projektin më të ri të qeverisë në Shkodër, rindërtimin e rrugës që lidh këtë qytet me plazhin e Velipojës, për të cilin tha se përfundon pas 18 muajsh.
Sot u prezantua dhe plani për transformimin e bregut perëndimor të liqenit të Shkodrës. Ky projekt, tha Rama, “do ta transformojë zonën në një perlë turistike dhe do të nxjerrë në dritë pasurinë kulturore e historike të zonës së liqenit në funksion të rritjes së turizmit, ekonomisë, punësimit e mirëqenies”.
