Kryeministri Edi Rama po zhvillon një bashkëbisedim me tre gazetarë në Velipojë. I pyetur lidhur me trafikun e drogës, teksa në Evropë janë kapur së fundmi tonelata me drogë, kryeministri tha se tashmë lufta kundër drogës është e fituar.
Ndërkohë, Rama është pyetur edhe mbi letrën e kreut të Policisë së Shtetit, Haki Çako drejtuar ministrit të Brendshëm Demirajt, të cilin e vinte në dijeni për mosfunksionimin e sistemit të radarëve në det, çka sipas tij ishte bërë pengesë për kapjen e skafeve me drogë që mund të niseshin nga Shqipëria.
Rama e quajti të gjithë këtë një “propagandë”, ndërsa shtoi se edhe partnerët konfirmojnë se territori është pastruar tashmë nga kanabisi:
“Jemi në fazën përmbyllëse të betejës dhe ne e kemi fituar këtë betejë. Të dhënat janë kokëforta. Nga ana tjetër bëhet gjithandej përpjekje për ta shpërndarë gjithë andej këtë lloj propagande, një lloj përpjekje e turpshme. Jemi në kushtet që edhe partnerët e konfirmojnë se territori është tërësisht i pastruar nga kjo mortje. E kam fjalën për kanabisin. Gjeni një tjetër film me se të merreni”. Kjo nuk do të përbëjë më asnjë lajm apo aktualitet”, tha Rama.
Lidhur me LSI-në, kryeminsitri tha se duhet parë se çfarë opozite do të bëjë kjo forcë politike, ndërsa shtoi se sulmet në PD nuk i bëjnë më përshtypje sepse ata bëjnë garë me njëri-tjetrin se cili “shan më bukur”:
S’ka qenë asnjëherë qëllimi që të bëjmë gjëra të caktuara sa e ka kurrizin LSI-ja. Do përfillim çdo deputet të PS-së, PD-së dhe LSI-së, se çfarë opozite del LSI-ja është një gjë për t’u parë në vijim sepse nuk është njësoj si PD-ja. Reagimet e Bregut, Patozit apo të tjerëve nuk më bëjnë përshtypje. Janë njësoj, si dy pika uji thjesht garojnë me njëri-tjetrin se kush shan më bukur. Merren me presione, jo me probleme.
