Ish-ministri i Brendshëm, Saimir Tahiri ishte një nga emrat që mund të rikonfirmohej në një nga dikasteret e kabinetit të kryeministrit Edi Rama.
Por, një gjë e tillë nuk ndodhi dhe shumëkush mbeti i habitur nga ky vendim i Ramës.
Po aq edhe Tahiri vetë. Ai u mjafua vetëm me një status në profilin e tij në Facebook, duke iu uruar “suksese kolegëve” të tij dhe se e pret një “rrugë e gjatë përpara.”
Të gjithë prisnin që Tahiri të zinte një nga postet kyçe në kabinetin e qeverisë “Rama 2”, për faktin se vetë kryeministri e kishte cilësuar më herët si një nga ministrat më të mirë të 25 viteve të fundit.
Por ministrinë për të cilën aq shumë u krenua kreu i qeverisë ia kaloi Fatmir Xhafajt, të cilin e rikonfirmoi sërish në krye të këtij institucioni.
Megjithatë, kryeministri Rama nuk do ta lërë pa gjë ish-ministrin e Brendshëm. Sipas burimeve të “Tirana Today”, Rama i ka ofruar atij kreun e Komisionit të Sigurisë, një post i mbajtur ky nga Spartak Braho në legjislaturën e fundit parlamentare.
Por, nga ana e tij, Tahiri nuk është se e ka pritur mirë ofertën e kryeministrit Rama, pasi dëshironte një post ministror, që nuk ishte domosdoshmërisht ai i Brendshëm të cilin e humbi prej muajsh. Por, një institucion të ngjashëm me të, si Ministria e Mbrojtjes apo edhe si ministër i Drejtësisë.
Vetë Tahiri nuk ka dashur t’i përgjigjet interesimit të “Tirana Today”, duke lënë që gjithçka të zyrtarizohet në muajin shtator kur do të nisë punën edhe institucioni i Kuvendit, në të cilin ai pritet të drejtojë kreun e Komisionit të Sigurisë.
