Kryeministri Edi Rama ka folur për herë të parë mbi vizitën e tij në samitin e NATO-s i mbajtur në Bruksel, ku i pranishëm ishte edhe presidenti amerikan, Donald Trump, të cilin para se të zgjidhej president Rama e cilësoi si turpi i njerëzimit. I vendosur para dhënies së një opinioni mbi liderët botërorë dhe në rastin e Trumpit Rama tha se “Trumpi është në hallet e veta, ndërkohë që është president i SHBA-ve”.
Në emisionin “Zonë e Lirë”, Rama vuri në dukje se e takoi dy herë Trumpin në samitin e NATO-s dhe foli shumë pak me të. Dhe Rama e pranoi se ai është një kryeplak fshati para Trumpit.
“Fola dy herë me Trumpin. Na prezantoi Sekretari i Përgjithshëm i NATO-s. Trumpi nuk më njihte. Kur fitoi Trumpi mendonte se do të më anashkalonte. Folëm një herë në fillim dhe pastaj gjatë vizitës që bëmë në hollin e godinës së re të NATO-s. Herën e parë folëm për Shqipërinë, për rajonin, në momentin që u prezantuam, kur dëgjoi Shqipëria pati një reagim pozitiv. Folëm sesi shkojnë gjërat. Ajo që dihet është se Shqipëria është vend multifetar dhe kjo ishte pjesë e bisedës. I thashë: E di që këtë godinën e kanë bërë arkitektët e Trump Tower në Chigao: “Po këta kanë marrë arkitektët e Trump Tower në Çikago dhe ndërtojnë godinën këtu”. Si mundet presidenti i SHBA-së, të dijë se çdo ndodh në këtë katund. Është njësoj sikur të më pyesësh mua se kush është kryeplaku i ndonjë katundi në Librazhd apo në Vuçidol”, u shpreh Rama.
