Kryeministri Rama njoftoi më parë të gjithë ndjekësit e tij në Instagram se do të jetë i ftuar sot në emisionin “Opinion” për të folur lidhur me zhvillimet e fundit të protestës së studentëve.
Rama shkruan se “pa dialog s’ka mundësi të kalohet nga kërkesat në distancë, në realizimin e tyre.
Gjithashtu kryeministri ka një mesazh të fortë ndaj studentëve kur ju kujton se “ABC-ja e demokracisë nuk zhbëhet me protesta”.
Në emision Rama do të jetë përballë një paneli gazetarësh dhe analistësh, ku bëjnë pjesë, Andi Bejtja, Robert Rakipllari, Mirela Milori dhe Mark Marku.
Kryeministri do t’ju përgjigjet pyetjeve të gazetarëve lidhur me qëndrimin e tij për dialog me studentët, ndërkohë që këta të fundit prej 9 ditësh protestë janë të vendosur për të mos dialoguar, pa marrë më parë konfirmimin e kryeministrit për plotësim të 8 pikave të parashtruara prej tyre.
Kujtojmë që Rama vjen në studion e emisionit “Opinion”, në një kohë kur kjo studio prej 3 ditësh është kthyer në një arenë diskutimesh të studentëve të pranishëm në protestë.
