Kryeministri Edi Rama gjatë një takimi elektoral në Paskuqan, një prej zonave me nivelin më të lartë të informalitetit në ndërtime, u ndal në atë që e cilësoi si një prej suksesve më të mëdha të qeverisë së tij, legalizimet.
Ai u kujtoi banorëve të Paskuqanit se Partia Demokratike në tërësinë e numrit të legalizimeve, pati vetëm 51% shtëpi, ndërkohë që nga legalizimet që u bënë gjatë këtyre katër viteve, 91% ishin shtëpi banimi, pavarësisht përkatësisë partiake të pronarëve të tyre.
“PD legalizoi ndërtime jashtë çdo kriteri të një sistemi normal urban”, tha ai
Rama përsëriti thirrjen për të votuar PS-në të dielën, në mënyrë që të marrë fuqinë dhe mundësinë e refuzimit të çdo koalicioni, nëpërmjet të cilit, pushteti do të ndahej si tepsi.
Megjithatë, kryeministri përsëriti vlerësimin për punën e bërë nga koalicioni qeveritar me LSI-në, që po shkon drejt shpërbërjes.
“Jam krenar për punën që kemi bërë në koalicion, tjetër punë pse aleatët tanë çirren, ulërasin e godasin reformat dhe gjërat më të mira që kemi bërë bashkë”, tha Rama.
Në fund të fjalës së tij, ai shtoi se reforma në drejtësi nuk mund të marrë jetë, nëse atë nuk e udhëheq Partia Socialiste.
“Na jepni fuqinë që të drejtojmë pa të tjerë në prehër, që të drejtojmë të vetëm timonin. Na jepni atë shejtan votë. Je i PD-së, rri me PD-në por votat na i jepni ne”, u tha ai banorëve të Paskuqanit.
